Gröts op alle Piëlreuze!
Wat is dit un moj gevuul um wakker te werre. Wat bin ik gröts op owlie as Piëlreuze. Hoe gullie dizze vastelaovend wer gevierd hebbe, dat is zó moj um te zien en te belaeve. Gullie zet nie allieën gans Reuzesteyn op zien kop, mar ok Rooy en nog ver daorbuute!
Vur un groeët deel van de jeugd begos ut zaoterdag al vroeg. Snel un goej ontbijt roond un uur of 7 en dan mit de bus naor Venlo. Daor was ut dit jaor nie allieën fieëst op de Parade, mar ok ien de Zoepkoel. Daor maog Pruuf Mar zich vur de urste kieër van zien beste kant laote zien. Roond de middag trokke de urste vastelaovesvierder richting de Roetjs. Un moj tradisie die nog lang zal blieve. Moj hoe de organisatie alles op alles zet um zien aege Rooyse artieste op ut podium te kriege. Oh nea. Mar goed, ut was uutaendeluk toch wel wer geniete.
Roond de aovend ginge de urste meense wer richting Reuzesteyn um zich vur te bereide op unne schonne aovend ien de Smelehof. Nao de kerk is op ut dörpspodium de vastelaovend officieel geopend mit unne goeje knal. Op naor de Smelehof waor Prins Peter, Prinses Fiona en de kiender ien ut zonnetje zien gezet. Unne schonne resepsie mit schonne stukskes. Hiernao was ut tied um los te gaon tot ien de late uurkes.
Dat zej tot ien de late uurkes zien durgegaon was op zondagmaerge goed te zien an un antal meense. Op ut kriemelbal motte ze dan lekker gek doen mit de klaenste Piëlreuze, mar dat is nie altied gemekkeluk. Roond de middag was ut tied vur de Formule 11 Reuzerees. Iederieën hed thuus goeëd geoefend um op dizze zondagmiddag de snelste tied op ut scorebord te kunne zette. Nar Mark hed zelfs zo hard zien best gedaon dat hej dur de wage hin docht te kunne renne. Daor hed hej now nog last van. Ok op dit circuit bleek dus nie iederieën veilig. Ok prins Peter was nie veilig. Hej is dur de ganse jeugdraod iengezaegend. Dizze dag wört al jaore afgeslote ien de Jera. Daor waor un antal Piëlreuze, sommige op un wat aparte manier, laote zien wat vur muzikaal talent zej ien huus hebbe. Van jong tot ald zette de tent flink op zien kop. Moj dat dat kan ien zon dörp!
Op maondag was ut moment daor. Ut moment waor ozze wagebouwers al maonde naor uutkieke. Ut moment waor zej gans Rooy wer kunne laote zien waor zej an hebbe gewerkt. Op ut begin nog efkus afwaachte of de optocht wel dur kos gaon, mar nao ut verlossende tillefoontje hiëlemol klaor. En daor kwame zej de bocht um richting den Engel. Twieë prachtige wages, geleid dur un antal schon groepe. Is ut dan aendeluk wer zo wiet? Göt de Piëlreus ien zien jubeleejum jaor mit den haas naor huus? Ien volle spanning stoonde de Piëlreuze bej de uutslag. Urst un groeët fieëst toen de urste pries bej de kleine groepe, midde groepe en de Jeugdprinse wage binne was gehald. As slot de uutreiking vur de prinsewage. Naodat de nummers 3 en 2 bekend ware, bleef ut hieël stil op ut plein. Mar dit duurde nie lang. Wat ging iederieën uut zien dak. Wat was ut moj um die wagebouwers un gat ien de lucht te zien springe! Wat kunne wej hier gröts op zien meense. Al die Piëlreuze die zo hard zien best doen um ok dizze optocht te laote schittere!
Naodat ut fieëst ien Rooy nog flink dur ging, kwaam iederieën wer richting Reuzesteyn um ien egel verder te viere. En mit iederieën bedoel ik ok echt iederieën. Wat was ut druk. Daor waor un dillegatie van de Piëlhaas, de Karklingels en ’t Knölleke nao hun fillesetasie richting hun aege dörp ginge, bleve ’t Dartele Veule en unne dubbeldekker uut ’t Tuuteriek tusse de Piëlreuze fieëste. Moj um te zien dat dit fieëst same is gevierd.
Toen was ut alwer dinsdag. De dag van ozze aege Reuzeoptocht. Net as de latste jaore wer un optocht mit veul startnummers! Jong en ald hebbe vur dit jubeleejum jaor wer alles uut de kast gehald. Ok op dizze dag was ut waer prachtig! Dit zörgde dur ok wer vur dat nevve de kaant hieël veul meense an ut geniete ware van ozze optocht. Nao de optocht en de priesuutreiking kos de Smelehof nog iëne kieër hiëlemol los gaon. Un moj moment um un aantal meense nog efkus te bedanke. Dit is gedaon dur hun op de nek te zette. Nao jaore, hiël veul jaore, ienzet vur de Piëlreus hebbe un antal meense beslote dat ut goeëd is gewest. Moj um te zien dat iederieën hun hiël dankbaar is! En nao ut officiële woord van Vorst Martijn, Vurzitter Jos en Prins Peter was ut dan echt gedaon. Un moje vastelaovend mit ut ganse dörp is afgeslote. Ut einde van un prachtig jubeleejum jaor!
Ok vur mej is ut wer tied um beej te komme van dizze daag. Ik wil owlie hartstikke bedanke vur ut laeze van mien columns. Wie wet wanniër wej os de volgende kieër wer zien! Piëlreuze, bedankt!
Tinus