Ut 6×11 vastelaovesseizoen is angekomme bej zien eindstation: de vastelaovend zelf. Ut is wer tied vur ut fieëst ien de Smelehof mit de jeugd van de Sint Oda. Op zaoterdag unne schonne dag waor de vasteloavesvierders uut os dörpke naor Venlo of Rooy zulle gaon um vervolges te eindige bej de receptie van de prins. Op zondag mit de klenste jeugd op ut kriemelbal ien de merge um aansluutend de wat aldere jeugd ien un badkuup un parkoer af te zien legge. Latter op de aovend unne moje aovend ien de Jera vur jong en ald. Op maondag de prachtige optocht ien Rooy waor gans Ysselsteyn altied wer beneejd is welke pries dur binnen gehald werre. En dan op dinsdag. De kers op den taart. De optocht ien os aege Reuzesteyn. Un optocht waor van jong af an hieël veul tied ien wörd gestoke.
De latste vurbals zien wer vurbeej. Afgeloeëpe waek was ut nog kei druk ien Roelanzia. Bejna iederieën was moj verkleejd (behalve de raod van elluf). Ok dizze aovend zaat de sfeer dur goeëd ien. Dur bloejde iets op dizze aovend. Dat was an alles te merke. Toen Hoondervel, de winnaar van ut LVK, kwaam optreeje ging ut dak dur af. Zej hoefde allieën mar ‘Jao Jao Jao’ te zinge en de ganse zaal stoond op zien kop. Dat bleve zej dan ok un kieër of 10 herhale. As afsluuter kwaam Pruuf mar ut fieëst compleet make. Al mit al wer unne schonne aovend!
Op zondagmaerge, toen iederieën wer (ongevaer) was bejgekomme, was ut tied vur de resepsie van de Reuzekluut. Nie normaal hoeveul meense hierop af zien gekomme. Zelfs de hieële korfbalclub kwaam Mieke en Maria bedanke vur hun jaore lange ienzet vur de club. Daornao was ut tied vur de resepsie van Jeugdprins Martijn. Ok de Jera was afgelaaje vol.
Dan begint de waek van de wagebouwers. Zej meuge trots de prinsewage en jeugdprinse wage laote zien. Op woensdag is ut de beurt an Jeugdprins Martijn um zien wage ien te zaegene en op donderdag is Prins Peter an de beurt. Ik bin beneejd wat die kels en vrollie dit jaor wer vur un spektakel vur os klaor hebbe staon. Ik heb nou alwer zin ien dat moment dat dees wages bej den Engel vurbeej trekke. Niet mer waachte op de Reuzeoptocht. Ik heb zin ien dees moj daag. Ik kan nie mer waachte! Ik spraek owlie mit de vastelaovend!