De Reuzekluut, de högste vastelaovesònderschejjing ien ut Piëlreuzeriek, wört dit jaor uutgereikt án twieë persoeëne, Maria Claessens en Mieke Rongen. De uutreiking viendt vur de 44e kieër pláts òp zòndág 24 fibberwarie ien de Smelehof um 13:11 uur. Iederieën kriegt de gelaegenhejd um Maria en Mieke te felisitiere. Wilde iets vurdragen, nim dan efkes kontakt op mit ut bestuur via Erwin Janssen, 06-14062643.
En spesjiaal jaor zóas ut jubeleejum, gaeft ok kans um iets unieks te doen. Weej reike dit jaor òzze Reuzekluut uut án twieë kanjers die Reuzesteyn riek is.
Mieke en Maria zien bejs echte Piëlreuzinne. Bejs gebore en getoge ien Ysselsteyn.
Maria is gebòrteg òp 10 mei 1960 en òpgegräöjd òp de Ysselsteynseweg 103. Zeej is en daochter van Harrie en An Claessens die nog steeds òp ut alderlek huus woeëne.
Maria het 1 zus en 3 bruurs, Maria is de twedde van ut gezin. Nao ur laegere schóltied ien Ysselsteyn is zeej naor ut vòrtgezet oonderwies gegaon ien Venroj. Zeej het daor urst de Mavo gedaon en ánsluutend nog de Havo. As beroepsòplejjing het zeej twieë jaor de MEAO ien Helmond gevolgd. Vanuut de òplejjing is zeej snel ien de verzekeringswaereld teraecht gekòmme. Veule cursusse wiere gevolgd um beej te blieve ien ur vak. Zeej is altied òntzettend gemotivierd um dees cursusse tot en goed aend te brenge. Maria is nòw nog altied waerkzaam ien de waereld van verzekeringe.
Mieke is gebòrteg òp de Piëlweg ien Reuzesteyn òp 17 juli 1964. Zeej is en daochter van Toon en Miet Rongen. Ien den tied dat Mieke naor de laegere schól ging, is ut gezin naor ut dörp verhuusd en wel naor de Peter Janssenweg. Mieke het 2 jòngere bruurs.
Al snel kwaam Mieke dur aachter dat zeej gén richtege student was. Zeej ging naor de Mavo en het hier ut maksimale ántal jaore ovver gedaon. Um en passende vervolgòplejjing te viende, was nie gemekkelek. Toen den destiedse direkteur van “ boereboond Ysselsteyn”, nòw baeter bekend as Vitelia, ur vroeg um òp kantoeër te kòmme waerke, wier dit mit bej hand ángenomeDe schóltied wier verleeje tied. Allerlejs hand – en spandienste wiere verricht ien die 5 jaor die zeej òp kantoeër het gewaerkt. Ut kwaam ok gedureg vur dat der ien de boondswinkel personieël uutviel. Mieke wier dan duk gevraogd um beej te springe. Snel naor huus um aandere klieër án te trekke. Ien de weenkel vuulde zeej zich as enne vis ien ut water. Mieke waerkt dees daag nog altied mit veul plezier ien de winkel weenkel van Vitelia.
Mieke en Maria kenne mekaer al vanáf ut vòrtgezet oonderwies. Vanuut ut korfballe òntstoond en hechte band en zien zeej ien dezellufde vriendinnegroep beland. Nao veule jaore samegewònd te hebbe, gave zillie òp 8 fibberwarie 2008 mekaer ut jao-woord.
Zeej woeëne nòw nog steeds gelukkig mit mekaer òp de Dopheide.
Maria is vanáf ur 9e jaor lid van de Peelkorf ien Ysselsteyn en Mieke vanáf ur 10e jaor. Vanáf den tied is de liefde vur dees sport òntstaon en hebbe zeej zich òp veule meniere verdienstelek gemákt.
Naodat Maria alle jeugdteams het durloeëpe, ging zeej òp 16-jäörege laeftied naor de seniore. Nao 1 jaor beej ut twed te hebbe gespeuld wier zeej dur geschove naor ut urste team. Hier het zeej en 20-tal jaore mit veul passie ien gespeuld. Veule jaore moog zeej ok de ánvoerster zien van ut urste team. Mit as hoeëgtepunt de promosie naor de hoeëfdklasse òp ut veld, már ok ien de zaal. Ur aktieve loeëpbaan het zeej áfgebowd ien ut twedde team en látter is zeej nog aktief gewist beej de midwaek. Ien ut jaor 2006 is zeej definitief gestopt as aktief speulster beej de korfbalclub.
Al vruug is Maria begònne mit ut gaeve van traininge binne de club. Veule juniore en pupille zien dur Maria òpgelejd. Hierdur zien veule verdiensteleke prieze gewònne. Òp 26-jaorege laeftied het Maria pláts genome ien ut dageleks bestuur van de verieëneging. Veule take wiere dur Maria uutgevoerd ien de daoròpvolgende jaore: Vice-vurzitster, notuliste, kontaktpersoeën van en vur de trainers, materiaal etc. Ok is zeej veule jaore hoeëfdjeugdleidster gewist van de jeugdkemissie. Teamiendaelinge wiere gemákt, trainsters en leidsters wiere gevraogd, zaaluure mòsse geregeld werre en natuurlek ok ut werve van neeje leeje. Ut was en intensieve periode um dees taak asvice vurzitster uut te voere. Maria is 20 jaor aktief bestuurslid gewist. Veule zake wiere ien dees periode besproke en uutgevoerd. Ut ware ok nie altied mekkeleke take die gedaon en geregeld mòsse werre.
Beej Mieke ging ur aktieve karrière as speulster der anders án toe as beej Maria. As 10-jäöreg megje is Mieke beej de aspirante begònne en durgestròmd naor de juniore. Vanuut de juniore is zeej beej ut derde team van de seniore begònne. Van ut derde naor ut twedde team en uutaendelek beej senioren 1. Helaas was dit nie van lánge duur. Zeej kreeg òp 24-jäörege laeftied en heftige blessure án ur kneej. Nao en ántal operasies en revalidasies het Mieke jommergenoeg mòtte stoppe as aktief lid van de korfbalclub. Òp ut moment van dees blessure kwaam der en trainerscursus vurbeej welke Mieke mit twieë hand ángreep. En neeje karrière as trainster/coach was gebore en wier mit veul passie uutgevoerd. Mit as hoeëgtepunt en pláts ien de NK-finale mit de A-juniore ien Eindhoven.
De jeugd was Mieke echt toevertrowd. Korfbal was en moejlek spel um te begriepe vur de klaenste (6-jäörege). Dit(makte Mieke fanatiek um hier iets mit te gaon doen. Zeej richtte same mit en paar aandere de KKV (Korfbalkring Venroj) òp. Dit was en kompetisie vur Welpe en F-Pupille, dus de allerklaenste, gespeuld ien de gemaente Venroj. Ut spel wier ángepastmit gröttere mandeen enne klaendere bal. Ok wiere der leuke schón korfbalspellekes bedòcht welke dur de jeugd mit veul schik wiere uutgevoerd òp ut veld, már ok duk daorbuute. De jeugd wier entosjast gemákt en dat was duudelek te maerke ien ut leeje-ántal wat lángsaam òp liep naor mieër dan 200 aktieve leeje. Uutaendelek zien der zellufs mit de KNKV gesprekke gewist um en waerkgroep òp te richte um dit breejer uut te voere. De KNKV zaag dus ien, dat ut ien Reuzesteyn goed geregeld is kwa jeugdòplejjing. Hierien was Mieke zeker en inisjator.
Vur de elders was ut spelleke korfbal ok moejlek. Dit zage Mieke en Maria ok ien. Um ut spel ok vur de elders duudelek te make, wiere der minicursusse gegaeve. Dees zien dur veule elders gevolgd, waordur zeej entosjast wiere ovver ut korfbalspel. Dit het ok beejgedrage án de leejegroej beej de korfbalclub.
Mieke en Maria hebbe zich bejs ieder vur zich òp veule vlakke iengezet vur de korfbalclub. Zeej zien hiervur bejs benuumd tot ieëre-lid van SV Ysselsteyn. Ok zien zeej bejs gröts dat zillie ien ut bezit zien van de trainers- en scheidsrechtersdiploma’s. Zillie zien jaore verieënegingsscheidsrechter gewist van de Peelkorf. Binne de Peelkorf hebbe zeej veule aspirant trainsters en leidsters begelejd. Hier wiere verschillende clinics en traininge vur georganisierd en uutgewaerkt. Same hebbe zeej evenemente georganisierd zóas de dág van de jeugd, alder-kiendwedstrieje, de jeugdchallenge vur clusterteams, de Nederlands Kámpioenscháppe vur jeugdteams ien de Wetteling ien Venroj, már ok wiere der internasionale òntmoetinge geregeld mit aandere vrollieteams van ovver de hieële waereld.
Ieën van de mojje initiatieve die zillie òpgezet hebbe, zien de welbekende korfbalkampe vur de jeugd. Ieder seizoen wier áfgeslote mit en kámp vur jeugdleeje tot en mit 11 jaor. De òpkòmst beej dit kámp is altied groeët. Ien totaal hebbe zillie dit kámp 16 jaor georganisierd. De jeugd keek hier echt naor uut. Mieke en Maria hebbe zich mit veul plezier iengezet um dees kampe goed te laote slage.
De Reuzekluut wört dit jaor uutgereikt án twieë dames mit en beejzondere staot van dienst vur de Ysselsteynse gemaenscháp en ver daorbuute. Beej Mieke en Maria zit ut korfbalhart òp de juuste pláts. Mieër dan 35 jaor hebbe zeej zich vol passie iengezet vur de verieëneging. Mieke en Maria zien waerdige draegsters van de Reuzekluut 2019, de högste vastelaovesònderschejjing ien ut Piëlreuzeriek.
Getaekend Bestuur Carnavalsverieëneging “De Piëlreus”
Vorst Martijn