Afgeloeëpe wiekend stoond ien ut taeke van de jeugdcarnaval. Vur degene die ut nog nie hebbe mitgekrege: ut bestöt 5×11 jaor. En dat is uuteraard flink gevierd ien Ysselsteyn. En waor kunde un jeugdfieëst baeter viere dan ien de Jera! Wat is os aege jeugd toch zonder Jera…
Op vreejdag was ut tied um afscheid te neme van ozze ald-jeugdprins Jens. Hej en vorst stef zien ontleejd dur de nar en hebbe de rest van de aovend ien aege klieër gevierd. Snel daornao was ut dan ok tied um de neeje jeugdprins, de jubileumprins, an te kondige. En ovver klieër gesproke: wat liepe Mark en René van ut jeugdcomité dur belachelijk schon bej. Ze hebbe alles uut de kast, of die van hun mam, getrokke en dur unne moje show van gemakt.
Nao un show waor de gaanse raod is vurgesteld an ut publiek en an verschillende opdrachte mos werre gehalde, was de neeje jeugdprins duudeluk: Lou Bruin is de neeje jeugdprins van ut Piëlreuzeriek, unne jubileumprins. Ok ien Rooj han ze dit mitgekrege en Peel en Maas TV was dur als de kiepe bej. Dit filmke is te bekieke op hun Facebook-pagina of op youtube. Prachtig die andacht vur ozze jeugdcarnaval. Ok vanuut de groeëte raod was dur andacht vur. Die hebbe un ganse clip gemakt en un liedje iengezonge.
Unne rustdag nao dizze moje aovend zaat dur nie ien vur ozze jeugd. Zaoterdagmiddag was gaans Ysselsteyn opgeroepe um stemme bej elkaar te verzamele vur os aege Pruuf Mar. Gaans Ysselsteyn en zelfs op plekke ien Rooj zien de meense gevraogd um te stemme. Same mit Maikel van de Coop hebbe ze dur ok nog un prachtig fieëst van gemakt. Dur ware optreejes van os aege Ysselsteynse artieste, mar ok van Gèn Vier, Goed Zat en de ander halve finalisten: Nevvenèn. Hierbeej hèd Maikel, sponsor van ut LVK, nog un del kaarte weggegaeve. Waor zon winkel ien ow aege durp wel nie goed vur is.
Ok de net-wat-aldere-jeugd, zoë as zej zichzelf zien, han un drukke middag. De net-wat-aldere-jeugd aachter de Jera wel te verstaon. De jeugd die aegeluk gen jeugd mer is en hier en daor un betje gries of kaal kiekt. Ze hebbe de buurt van Prins Jelle hieëlemol versierd. Prachtig hoe dat dur now uut ziet. Dat mot trouwes ok wel mit 7 raodsleeje ien de buurt.
Nao unne moje middag was ut alwèr metieën tied vur ut jubileumfieëst. Uuteraard ien os aege Jera. Want ik kan ut nie genoeg zegge, wat is os aege jeugd toch zonder Jera… En nie allieën os aege jeugd. Ok de jeugdraod van ’t Knölleke en ’t Dartele Veule ware anwezig ien un bomvolle Jera. Hier ware dan ok prachtige optreejes van onder aandere Pruuf Mar en Bjorn en Mieke te zien. Wat was ut toch pracht um te zien dat Bjorn op de nek dur de zaal schoot.
Ok nog un moj moment op dizze aovend was de onderscheiding vur René van de pas. Hej is nameluk precies 11 jaor bej ut Jeugdcomité. Moj hoe hej de jeugd jaor ien jaor uut, saame mit de aandere comité-leeje, klaor stoomd vur unne geweldige vastelaovend. René van harte profiesjat!!
Ankommende waek is ut alwèr tied vur de urste bonte aovenden en de jeugdbontemiddag. De artieste kunne now nog efkus de latste puntjes op i zette. Ik bin hartstikke beneejd naor dizze prachtige aovend!