Column van Tinus: Prins Jelle dun Urste!

De aovend begòs mit un traon. Ozze ald-prins Eric en zien prinses Marika zien afgetreeje as prinseluk echtpaar. De knuppel, muts en mantel zien dur Nar Mark afgepakt en die kreeg hej ok nie mer terug. Die zien vur den neeje prins.

Toen was ut tied um de Reuzekluut uut te reike. Dit is altied un moj moment vur iemand die veul vur de Ysselsteynse gemaenschap betaekend. Dit jaor maog Bert van Veghel dees pries ien ontvangst neme. Bert, Proficiat!

Wat was ut moj um te zien hoe gans de Smelehof vol stoond mit meense. Van jong tot ald, van groeët tot klaen, ut makt niks uut: iederieën was anwezig um te zien wie prins van ut Piëlreuzeriek zeuj wèrre. Uutaendeluk kwaame dur zelfs meense vanuut ut stedje van lol en plezeer de zaal binne loeëpe. Beejna allemaol mit un masker op. Jao, bejna. Dit zurgde dur vur dat al wat lempkes ginge braande.

Gelukkig was dit pas toen Vorst Martijn en Vurzitter Jos al bezig ware mit hun tocht op zuuk naor den Prins. Martijn ging hier vur bej aandere meense slaope um te kieke of dur un klik te viende was. uutaendeluk bleek dat hej toch nie tevreeje was. Nummer 29 was de gelukkige: daor was de juuste klik. Of dat dur Jelle of Mariska kwaam is nie mèr bekend gemakt. Ut fieëst barstte los toen ut stel de deur uut kwaam geloeëpe. Metieën op de nek en de zaal roond. Daornao was ut tied vur ut officiële moment. Nar Mark zurgde dur vur dat jelle gans angekleejd ut fieëst veurop kos durzette, mit prinses Mariska bej zich.

De DJ’s zurgde dur vur dat iederieën goed bezig bleef. Af en toe was dur tied um snel efkus wat dreenke te hale, mar dan begòs ut volgende liedje en ging de zaal wèr op zien kop. Ut clublied van VVV kwaam ok vurbeej en as ge docht dat Jelle nie nog mieër kos straole, was toen ow maening veranderd. Hej pakte efkus zien momentje en toen ging de vastelaovesmuziek wer dur. Tot ien de late uurkes bleef de Smelehof goed gevuld. Dat wil zegge dat iederieën ut goed nòr zien zin haaj. Op naor ut volgende fieëst!

En mit dees korte vastelaovesperiode duurt dat nie lang. Ankommende vreejdag is ut aftreeje van Jeugdprins Jens ien de Jera en op diezelfde aovend zal ok de neeje jeugdprins antreeje. Un biezonder moment, zeker now ut vief kieër elluf is. Ik heb huure zegge dat ut jeugdcommité dur alles an doet um dur un fantastische aovend van te make!

Op vreejdagaovend kunde ok al stemme op Pruuf Mar. Meschien dat ze dit jaor wel ien de finale van ut LVK staon te schittere. Dat zuuj moj zien, want al mieër dan honderd Ysselsteyners hebbe un kartje vur die finale. Um te kieke wannieër ge allemaol precies kunt stemme, motte mar efkus op hun Facebook kieke of efkus un berichtje sture. Op zaoterdag gaon Stef en Tamara ok wèr mit un ganse dillegatie langs de deure um stemme op te hale. Dit doen ze naodat ze de halve finale terug hebbe gezien bej de COOP.

Zaoterdagaovend stöt wèr ien ut taeke van vief kieër elluf Jeugdcarnaval. Dit is un fieëstaovend waor iederieën vur is uutgenodigd. Bjorn en Mieke komme hier zinge, net als Pruuf Mar. DJ Eleven zurgt vur de rest van de meziek dizze aovend. Kortom: vastelaovend is los!