COLUMN VAN TINUS: WEJ MEUGE WÈR!!

Nao host twieë jaor zuuke naor ôzze Rinus hed de behiërder beslote um toch mar verder te gaon kieke. Van Rinus is nog gen spoor bekend. Nao twieë jaor blindelings vuurbej te zien geloeëpe kreeg ik dan toch de kaans um mien zegje te meuge doen.

Vur de maeste Piëlreuze is Vastelaovend aegeluk allang begôs. De urste activiteit van dit seizoen was de jaorvergadering. Dit jaor was ut extra speciaal, umdat ut de latste was den van ut woord van Bart marcellis kwaam. Nao 6 jaor vurzitter te zien gewèst, hed hej d’n hamer an Jos Geurts gegaeve. Op dizze drukbezochte vergadering zien d’r nog wat miër wisselingen, mar dat hedda allemaol al kunne laeze.

Ok op d’n ellefde van d’n ellefde was ôs durp wer goeed anwezig ien ut zuuje. Un ganse bus mit, vural jeugdige, Piëlreuze vertrok ien alle vroegte naor Mestricht. De maeste zien hiëlhuuds angekomme en hebbe de Vastelaovend prachtig geopend op un gans vol plein. Hiernao kwaame bejna alle groëte artieste uut Limburg optreeje en was ut de ganse daag verder geniete.

Nao dizze fiësteluke opening was ut alwer host tied vur d’n Ysseslsteynse liedjesaovend. Ozze aege artieste uut ut Piëlreuzeriek hebbe ok dit jaor wer prachtige liedjes gemakt. Ut was hieël spannend wie dit kieër mit de pries naor huus ging. Die van Lemmens zien de groeëte winnaars! Luuk en Vera hebbe now wèr un extra reeje um thuus ruzie te meuge maake, want wie kriegt den schitterende Wiet van der Hoff troffee baove ut bed?

Van dees schon traditie gaon we aover naor un ander schon traditie: kartjes hale vur d’n bonte aovend. Ut werd elluk jaor wer gekker mit die jeugd. Un paar jaor geleeje ware ze nog gek ware as ze um 7.00 uur daor gingen staon. Inmiddels zien dur al un paar an ut ovvernaachte bej Egelmeers. En nie op un lekker bed gespreid dur Liesbeth… Nae gewoën op die houte baank. Stelletje gekke. Mar ja, ge mot dur wat vur doen as ge op d’n jeugdaovend anwezig wilt zien. Want dat is gèn zekerheidje mer. Zo-veul jeugd die hierbeej wil zien. Mar ok zo-veul meense die denke(!) dat ze nog jeugdig zien…

Now toch alle Piëlreuze op 30 vierkante maeter beej elkaar stonde, was dit ok un moj moment vur ut prinse raoje. Ut is altied moj um te zien hoe meense elkaar probiere te teste of ze toch nie stiekem prins of prinses wèrre dit jaor. Zelfs degene die mit de papierkes langs komme zien verdacht. Lang hoeve we nie te waachte op de bekendmaking. As iederieën zien buuk roond hed gegaete mit Kerst en goed ut neej jaor is ien gegaon is ut spikkeliere afgeloëpe. Tot die tied zulle dur af en toe nog wat papierkes vurbeej komme um te kunne raoje.

Dit was dan mien urste verslag. Ien ut korte Vastelaovesseizoen dit jaor kom ik nog wel af en toe mien zegje doen. Hopelijk tot dan!

Tinus, de bruur van Rinus